ວັນທີ 19 ກຸມພາ 2019 ທີ່ຜ່ານມາຢູ່ທີ່ຫ້ອງປະຊຸມ ສະຫະພັນບານເຕະແຫ່ງຊາດລາວ ໄດ້ມີກອງປະຊຸມ ຜູ້ຄວບຄຸມ ການແຂ່ງຂັນ ບານເຕະ ເປບຊີ ລາວພຣີເມຍລີກ 2019 .


ທ່ານ ນາງ ກັນຍາ ແກ້ວມະນີ ເລຂາທິການ ສະຫະພັນບານເຕະແຫ່ງຊາດລາວ ໄດ້ເນັ້ນຫນັກໃຫ້ບັນດາຜູ້ຄວບຄຸມການແຂ່ງຂັນບານເຕະ ເປບຊີ ລາວພຣີເມຍລີກ 2019 ໃຫ້ເອົາໃຈໃສ່ລະອຽດກ່ຽວກັບການແຂ່ງຂັນທຸກໆນັດເປັນໄປຕາມກົດລະບຽບການແຂ່ງຂັນ ແລະ ມີຄວາມເປັນທຳຕໍ່ກັບທຸກໆທີມທີ່ເຂົ້າຮ່ວມການແຂ່ງຂັນ.


ນອກຈາກນັ້ນ ທ່ານ ສັນຕິກອນ ແສງດາລາ ຮອງຫົວຫນ້າພະແນກຈັດການແຂ່ງຂັນ ສຕລ ຍັງໄດ້ເຜີຍແຜ່ກ່ຽວກັບວິທີການ ການນໍາໃຊ້ລະບົບ FIFA CONNECT ແລະ AFC CMS ໃຫ້ກັບຜູ້ຄວບຄຸມການແຂ່ງຂັນ.


ສຳລັບລະບົບ FIFA CONNECT ແມ່ນລະບົບການລົງທະບຽນບຸກຄະລາກອນທີກ່ຽວຂ້ອງກັບວຽກງານກິລາບານເຕະຂອງ ສະຫະພັນບານເຕະນາໆຊາດ ແລະ ບັນດາສະຫະພັນບານເຕະສະມາຊິກ,ຖານຂໍ້ມູນຂອງບຸກຄະລາກອນໃນວຽກງານບານເຕະ,ຄື່ອງມືຢັ້ງຢືນຕົວຕົນຂອງການເປັນນັກກິລາທີ່ຖືກຕ້ອງໃນການແຂ່ງຂັນລະດັບສູງ,ການລົງທະບຽນຄັ້ງດຽວໃນຊີວິດຂອງບຸກຄະລາກອນໃນວຽກງານບານເຕະ.


ສ່ວນລະບົບ AFC CMS ແມ່ນເຄື່ອງມືໃນການບໍລິຫານການແຂ່ງຂັນທີ່ສະຫະພັນບານເຕະອາຊີຈັດຫາໃຫ້ສະຫະພັນບານເຕະສະມາຊິກ,ເຄື່ອງມືບັນທຶກສະຖິຕິທີ່ກ່ຽວຂ້ອງກັບການແຂ່ງຂັນຂອງນັກກິລາ, ເປັນເຄື່ອງມືອຳນວຍຄວາມສະດວກໃນການດຳເນີນຂັ້ນຕອນທີ່ກ່ຽວຂ້ອງກັບການແຂ່ງຂັນຂອງພາກສ່ວນຕ່າງໆ ແລະ ຫຼຸດຜ່ອນການເກັບກໍາຂໍ້ມູນແບບເຈ້ຍສໍຖານຂໍ້ມູນການແຂ່ງຂັນເຄື່ອນທີ່ສາມາດເຂົ້າເຖິງໄດ້ຢ່າງງ່າຍດາຍ.


ການແຂ່ງຂັນບານເຕະ ເປບຊີ ລາວພຣີເມຍລີກ 2019 ຖືວ່າເປັນປີທຳອິດທີ່ໄດ້ນຳໃຊ້ລະບົບ FIFA CONNECT ແລະ AFC CMS ເຂົ້າໃນການແຂ່ງຂັນພ້ອມດຽວກັນບັນດາ 6 ສະໂມສອນທີ່ເຂົ້າຮ່ວມການແຂ່ງຂັນແມ່ນໄດ້ ລົງທະບຽນຄະນະຄູຝຶກ ແລະ ນັກກິລາ ແບບອອນລາຍ.

ຕາຕະລາງການແຂ່ງຂັນບານເຕະ ເປບຊີ ລາວພຣີເມຍລີກ 2019 ອາທິດ ທີ 1

ວັນເສົາ 23 ກຸມພາ 2019


- ເວລາ 16:00 ສະໂມສອນ ປກສ ເອັຟຊີ ພົບ ສະໂມສອນ ກອງທັບ ເອັຟຊີ ແຂ່ງຂັນຢູ່ທີ່ສະຫນາມກິລາແຫ່ງຊາດຫລັກ 16 ( ຖ່າຍທອດສົດ Mycujoo )


Link ຖ່າຍທອດສົດ : https://mycujoo.tv/video/lao-football-federation?id=34969

- ເວລາ 18:45 ສະໂມສອນ ມາສເຕີ້ ເຊເວັ້ນ ເອັຟຊີ ພົບ ສະໂມສອນ ຊ້າງນ້ອຍ ເອັຟຊີ ແຂ່ງຂັນຢູ່ທີ່ສະຫນາມກິລາແຫ່ງຊາດຫລັກ 16 ( ຖ່າຍທອດສົດ Mycujoo )


Link ຖ່າຍທອດສົດ : https://mycujoo.tv/video/lao-football-federation?id=34970