​ວັນ​ເສົາ 23 ກຸມ​ພາ 2019 ໄດ້​ມີ​ ການ​ແຂ່ງ​ຂັນ​ບານ​ເຕະ ເປບ​ຊີ ລາວ​ພ​ຣີ​ເມຍ​ລີກ 2019 ຢູ່​ທີ່​ສະ​ຫນາມ​ກິ​ລາ​ແຫ່ງ​ຊາດ​ຫລັກ 16 ຄູ່​ທຳ​ອິດ​ແຂ່ງ​ຂັນ​ເວ​ລາ 16:00 ເປັນ​ການ​ພົບ​ກັນ​ລະ​ຫວ່າງ ສະ​ໂມ​ສອນ ປກສ ເອັ​ຟ​ຊີ ພົບກັບ ສະ​ໂມ​ສອນ ກອງ​ທັບ ເອັ​ຟ​ຊີ, ປກສ ເອ​ຟ​ຊີ ນັດ​ນີ້​ນຳ​ທັບ ໂດຍ​ ຕີ່​ນີ່ ບຸນ​ມະ​ໄລ, ສຸກ​ຈິນ​ດາ ນັດ​ຜາ​ສຸກ, ແສງ​ອາ​ທິດ ສົມ​ວົງ ພ້ອມ​ນັກ​ເຕະ​ປະ​ສົບ​ການ​ສູງ​ຫລາຍ​ຄົນ ສ່ວນ ກອງ​ທັບ ເອັ​ຟ​ຊີ ນຳ​ທັບໂດຍ ພູ​ທອນ ອິນ​ນະ​ໄລ ຫົວ​ຫນ້າ​ທີມ, ຊູ​ຊະ​ນະ ສີ​ຫາ​ລາດ, ແກ້ວ​ອຸ​ດອນ ສຸ​ວັນ​ນະ​ສັງ​ໂສ ປະ​ສົມ​ປະ​ສານ​ກັບ​ບັນ​ດາ​ນັກ​ເຕະ​ດາວ​ຮຸ່ງ ຊຸດ ດີ​ວີ​ຊ​ັນ.

ເກມ​ດັ່ງ​ກ່າວ​ນີ້​ເປັນ​ທາງ​ດ້ານ ປກ​ສ ເອັ​ຟ​ຊີ ທີ່ຫລິ້ນໄດ້​ດີ ແລະ ມີ​ໂອ​ກາດ​ຍິງ​ປະ​ຕູ​ຫລາຍ​ຄັ້ງ​ແຕ່​ບໍ່​ຜ່ານ​ຜູ້​ຮັກ​ສາ​ປະ​ຕູ ກອງ​ທັບ ເອັ​ຟ​ຊີ ແກ້ວ​ອຸ​ດອນ ສຸ​ວັນ​ນະ​ສັງ​ໂສ ສາ​ມາດ​ປ້ອງ​ກັນ​ໄວ້​ໄດ້, ເກມ​ທຳ​ທ່າ​ຈະ​ຈົບ​ລົງ​ດ້ວຍ​ຜົນ​ສະ​ເຫມີ​ກັນ ສຸດ​ທ້າຍ ປ​ກ​ສ ເອັ​ຟ​ຊີ ມາ​ໄດ້​ປະ​ຕູ​ຈາກ​ຈັງ​ຫວະທີ່ ຄ​ຳ​ຫລ້າ ວົງ​ຄຳ​ແດງ ເອົາ​ຫົວຕີ​ບານ ຕັ້ງ​ມາ​ໃຫ້ ສຸກ​ຈິນ​ດາ ນັດ​ຜາ​ສຸກ ວອ​ລ​ເລ້ ສຽບ​ປະ​ຕູ​ເຂົ້າ​ຢ່າງ​ສວຍ​ງາມ​ເຮັດ​ໃຫ້ ປກ​ສ ເອັ​ຟ​ຊີ ເອົາ​ຊະ​ນະ ກອງ​ທັບ ເອັ​ຟ​ຊີ 1-0.

ສຳ​ລັບ​ຕ​າ​ຕະ​ລາງ​ກາ​ນ​ແຂ່ງ​ຂັນ​ນັດ​ຕໍ່​ໄປ​ ສະ​ໂມ​ສອນ ປກ​ສ ເອັ​ຟ​ຊີ ຈະ​ລົງ​ສະ​ຫນາມ​ນັດ​ທີ 2 ພົບ​ກັບ ສ​ະ​ໂມ​ສອນ ຊ້າງ​ນ້​ອຍ ເອັ​ຟ​ຊີ ເຊິ່ງ​ຈະ​ແຂ່ງ​ຂັນ​ໃນ​ວັນ​ທີ  09 ມີນາ 2019 ເວ​ລາ 17:00 ແຂ່ງ​ຂັນ​ຢູ່​ທີ່​ສະ​ຫນາມ​ກິ​ລາ​ແຫ່ງ​ຊາດ​ຫລັກ 16, ສ່ວນ ສະ​ໂມ​ສອນ ກອ​ງ​ທັບ ເອ​ຟ​ຊີ ຈະ​ລົງ​ສະ​ຫນາມ​ນັດ​ທີ 2 ພົບກັບ ສະ​ໂມ​ສອນ ອີໂວ ຢູ​ໄນ​ເຕັດ ເຊິ່ງ​ຈະ​ແຂ່ງ​ຂັນ​ໃນ​ວັນ​ທີ 30 ມີ​ນາ 2019 ເວ​ລາ 17:00 ແຂ່ງ​ຂັນ​ຢູ່​ທີ່​ສະ​ຫນາມ​ກິ​ລາມ​ຊ.