ທ່ານ ພອນເພັງ ຈັນທະວົງ ໄດ້ສະແດງຄວາມຍ້ອງຍໍຊົມເຊີຍມາຍັງຄະນະຄູຝຶກ ທີ່ພ້ອມກັນເອົາໃຈໃສ່ຢ່າງຕັ້ງໜ້າເຂົ້າໃນການຄັດເລືອກນັກກິລາ ຈາກຈຳນວນ 100 ກວ່າຄົນ ຍັງເຫຼືອພຽງເກືອບ 30 ຄົນ ເຊິ່ງບໍ່ແມ່ນເລື່ອງງ່າຍ ສ່ວນນັກກິລາ ທີ່ຖືກເລືອກແລ້ວກໍຕ້ອງສືບຕໍ່ເສຍສະຫຼະເຂົ້າໃນການຝຶກຊ້ອມ ແລະ ຮັບຟັງຄຳສັ່ງສອນຂອງຄູຝືກວາງແຜນຝຶກຊ້ອມໃຫ້ຢ່າງຕັ້ງໜ້າ ເພື່ືອໃຫ້ຕິດ 1 ໃນ 25 ຄົນ ເພື່ອໃຫ້ຄະນະຄູຝຶກກຽມສົ່ງລາຍຊື່ທູກຄົນໃຫ້ແກ່ສະຫະພັນບານເຕະແຫ່ງຊາດລາວ ເພື່ອບັນຈຸເຂົ້າໃນລີດລາຍຊື່ແຂ່ງຂັນ ສິ່ງສຳຄັນເມື່ອທຸກຄົນກ້າວມາເຖິງນີ້ ກໍຂໍຮຽກຮ້ອງໃຫ້ທຸກຄົນຈົ່ງພ້ອມກັນຕັດສິນໃຈສູງ ສູ້ເພື່ອທີມ ແລະ ສູ້ເພື່ອໃຫ້ສົມສັກສີຂອງຕົນເອງ ເພື່ອສ້າງຜົນງານພາທີມຢູ່ອັນດັບດີທີ່ສຸດ ຈາກ 7 ສະໂມສອນ ເຂົ້າຮ່ວມແຂ່ງຂັນ ທັງນີ້ ທັງນັ້ນ ກໍເພື່ອ ອະນາຄົດຂອງເອງ ໃນຕໍ່ໜ້າ ສາມາດກ້າວຂຶ້ນໄປສັງກັດສະໂມສອນ ໃຫຍ່ໆ ພ້ອມທັງລຸ້ນຕິດທີມຊາດອີກດ້ວຍ.
ຂະນະທີ່ທ່ານ ໃຈ ພົມມະທັດ ຄະນະຄູຝຶກສະໂມສອນ ວຽງຈັນ ເອັຟທີ ກ່າວວ່າ: ແນ່ນອນ ໃນທິດນີ້ ພວກເຮົາຈະໄດ້ດຳເນີນການສືບຕໍ່ຄັດເລືອກນັກກິລາທີ່ນອນໃນເປົ້າໝາຍຢ່າງແທ້ຈິງ ຜູ້ທີ່ຈະໄດ້ສັງກັດທີມ ພ້ອມທັງຮັບຄ່າເມື່ອຍຈາກສະໂມສອນ ການຝຶກຊ້ອມໄດ້ດຳເນີນມາໄດ້ເກືອບ 4 ອາທິດແລ້ວ ຫຼັງຈາກໄດ້ນັກກິລາໃນຈຳນວນເກືອບ 30 ຄົນ ກໍນຳພາເຂົາເຈົ້າລົງຝຶກຊ້ອມທິດລະ 5 ວັນ ເລີ່ມຕັ້ງແຕ່ວັນຈັນ ຫາ ວັນສຸກ ມື້ລະ 2 ຊົວໂມງ ສຳລັບການຝຶກຊ້ອມໃນທິດນີ້ ກໍຈະເນັ້ນໜັກການຝຶກຊ້ອມໜັກ ດ້ວຍການເອົາຄວາມທົນກັບລະບົບກ້າມຊີ້ນ ແລະ ການຄອບຄອງບານເປັນຫຼັກຂອງນັກກິລາ ໂດຍມີຄວາມພ້ອມແລ້ວປະມານ 60-70 ເປີເຊັນ.
ສຳລັບການແຂ່ງຂັນ ລາຍການ ເປບຊີ ລາວລີກ 1 ປະຈຳພາບ 2020 ນີ້ມີທັງໝົດ 7 ສະໂມສອນເຂົ້າຮ່ວມແຂ່ງຂັນ ປະກອບມີ ສະໂມສອນ ລາວ ໂຕໂຢຕ້າ ເອັບຊີ ດີກຣີແຊ໋ມ 4 ສະໄໝຊ້ອນ, ສະໂມສອນ ມາສເຕີ ເຊເວັນ ເອັບຊີ, ສະໂມສອນ ປກສ ເອັບຊີ, ສະໂມສອນ ຊ້າງນ້ອຍ ເອັບຊີ, ສະໂມສອນ ເອສຣາ ເອັບຊີ, ສະໂມສອນ ວຽງຈັນ ເອັບທີ ແລະ ສະໂມສອນ ວຽງຈັນ ເອັບຊີ ການແຂ່ງຂັນກຳນົດຈະເປີດແຂ່ງຂັນຢ່າງເປັນທາງການໃນວັນທີ 11 ກໍລະກົດ 2020ນີ້. ນອກຈາກນັ້ນ, ກໍຍັງມີອີກ 2 ລາຍການ ໃຫຍ່ ກໍຄື ລາວລີກ 2 ໂດຍມີ 14 ສະໂມສອນ ເຂົ້າຮ່ວມແຂ່ງຂັນ ແລະ ຄາດວ່າຈະຈັດຂຶ້ນໃນທ້າຍເດືອນກໍລະກົດ ແລະ ລາຍການສຸດທ້າຍ ແມ່ນເຕະບານ ລາຍການ ເອັບເອຄັບ ກຳນົດເອົາ ທີມຈາກລາວລີກ 1 ແລະ ລາວລີກ 2 ລວມທັງໝົດ 21 ທີມ ພ້ອມທັງມາຈັບສະຫຼາກແຂ່ງຂັນ ທີມໃດເສຍຕົກຮອບເລີຍ ລາຍການດັ່ງກ່າວ ຄາດວ່າ ຈະຈັດຂຶ້ນໃນເດືອນສິງຫານີ້.
By Lao League
0 ຄຳ ເຫັນ
ທ່ານຕ້ອງເຂົ້າສູ່ລະບົບເພື່ອໃຫ້ ຄຳ ເຫັນ.