ຄວາມທ້າທາຍໃຫມ່ ພຸດທະສັກ ສິລິກຸນ ຍ້າຍຮ່ວມ ສະໂມສອນ ຊ້າງນ້ອຍ ເອັຟຊີ

 

ພຸດທະສັກ ສິລິກຸນ ກອງຫລັງ ຈາກ ສະໂມສອນ ຫລວງພະບາງ ຢູໄນເຕັດ ຍ້າຍຮ່ວມສະໂມສອນ ຊ້າງນ້ອຍ ເອັຟຊີ, ປະຫວັດຂອງ ພຸດທະສັກ ສິລິກຸນ ແມ່ນເຄີຍຫລິ້ນໃຫ້ກັບ ສະໂມສອນ ຫລວງພະບາງ ຢູໄນເຕັດ ເປັນຜູ້ຍິງປະຕູທຳອິດໃຫ້ກັບ ສະໂມສອນ ຫລວງພະບາງ ຢູໄນເຕັດ ທີ່ເຂົ້າຮ່ວມການແຂ່ງຂັນບານເຕະ ເປບຊີ ລາວພຣີເມຍລີກ 2018 ຖືວ່າເປັນປະຕູປະຫວັດສາດ ຂອງ ແຂວງຫລວງພະບາງ ທີ່ໄດ້ມາຮ່ວມແຂ່ງຂັນໃນລີກສູງສຸດ ເກີດເມື່ອວັນທີ 03 ມີນາ 1995, ສູງ 165 ຊັງຕີແມັດ ແລະ ໜັກ 60 ກິໂລກຣາມ ເກີດທີ່ບ້ານເມືອງງາ ເມືອງຫລວງພະບາງ ແຂວງ ເປັນລູກຂອງ ທ້າວ ຄຳສິງ ສິລິກຸນ ແລະ ນາງ ອໍລະໄທ ສິລິກຸນ ມີອ້າຍ 2 ຄົນ ແລະ ລາວເປັນລູກຫຼ້າ, ຜົນງານກ່ອນຈະກ້າວມາເປັນນັກກິລາ ແມ່ນເປັນນັກກິລາແຂວງຫລວງພະບາງ ເຄີຍເຂົ້າຮ່ວມ ງານມະຫາກຳກິລານັກຮຽນມັດທະຍົມສຶກສາ ທົ່ວປະເທດ ຄັ້ງທີ 4 ທີ່ແຂວງ ສະຫວັນນະເຂດ ໃນປີ 2011 ແລະ ເປັນນັກກິລາຂອງ ທີມທະນາຄານ ແຂວງຫລວງພະບາງ  ແລະ ຫລວງພະບາງ ຢູໄນເຕັດ ລາວພຣີເມຍລີກ 2018.

 

 

ໂດຍ ພຸດທະສັກ ໃຫ້ສໍາພາດວ່າ: ຮູ້ສຶກດີໃຈຫລາຍທີ່ເປັນສ່ວນຫນຶ່ງຂອງສະໂມສອນ ຊ້າງນ້ອຍ ໃນການເຂົ້າຮ່ວມການແຂ່ງຂັນບານເຕະ ເປບຊີ ລາວລີກ 1 ປະຈຳປີ 2020, ກ່ອນທີ່ຈະຕັດສິນມາຮ່ວມ ສະໂມສອນ ຊ້າງນ້ອຍ ເອັຟຊີ ຕົນເອງ ແມ່ນໄດ້ຂຶ້ນມາສຶກສາຕໍ່ຢູ່ທີ່ ມະຫາວິທະຍາໄລແຫ່ງຊາດ ຄະນະວິທະຍາສາດການກີລາ-ກາຍະກໍາ ແລະ ໄດ້ມາຄັດເລືອກເພື່ອເຂົ້າຮ່ວມທີມ ຊ້າງນ້ອຍ. 

 

 

ການແຂ່ງຂັນ ລາຍການ ເປບຊີ ລາວລີກ 1 ລະດູການ 2020 ນີ້ມີທັງໝົດ 7 ສະໂມສອນເຂົ້າຮ່ວມແຂ່ງຂັນ ປະກອບມີ ສະໂມສອນ ລາວ ໂຕໂຢຕ້າ ເອັຟຊີ ດີກຣີແຊ໋ມ 4 ສະໄໝຊ້ອນ, ສະໂມສອນ ມາສເຕີ້ ເຊເວັ້ນ ເອັຟຊີ, ສະໂມສອນ ປກສ ເອັຟຊີ, ສະໂມສອນ ຊ້າງນ້ອຍ ເອັຟຊີ, ສະໂມສອນ ເອສະຣາ ເອັຟຊີ, ສະໂມສອນ ວຽງຈັນ ເອັຟທີ ແລະ ສະໂມສອນ ວຽງຈັ ເອັຟຊີ ການແຂ່ງຂັນກຳນົດຈະເປີດແຂ່ງຂັນຢ່າງເປັນທາງການໃນວັນທີ 11 ກໍລະກົດ 2020 ຈົນເຖິງ ວັນທີ 03 ຕຸລາ 2020. ນອກຈາກນັ້ນ, ກໍຍັງມີອີກ 1 ລາຍການ ໃຫຍ່ ກໍຄື ແມ່ນ ການແຂ່ງຂັນບານເຕະຊີງຂັນ ສຕລ ປະຈຳປີ 2020 ກໍານົດເອົາ ທີມຈາກລາວລີກ 1 ແລະ ລາວລີກ 2 ລວມທັງໝົດ 21 ທີມ ພ້ອມທັງມາຈັບສະຫຼາກແຂ່ງຂັນ ທີມໃດເສຍຕົກຮອບເລີຍ ລາຍການດັ່ງກ່າວ ຄາດວ່າ ຈະຈັດຂຶ້ນໃນເດືອນສິງຫານີ້.
ການແຂ່ງຂັນໃນປີນີ້ແມ່ນຈະໃຊ້ 2 ສະຫນາມຄື: ສະຫນາມກິລາແຫ່ງຊາດຫລັກ 16 ສະຫນາມໃນ ແລະ ສະຫນາມນອກ .

ຕາຕະລາງການແຂ່ງຂັນອາທິດທຳອິດ

ວັນທີ 11 ກໍລະກົດ 2020 ມີການແຂ່ງຂັນ 2 ຄູ່

- ເວລາ 16:00 ສະໂມສອນ ມາສເຕີ້ ເຊເວັ້ນ ເອັຟຊີ ພົບ ສະໂມສອນ ລາວໂຕໂຢຕ້າ ເອັຟຊີ ແຂ່ງຂັນຢູ່ທີ່ສະຫນາມກິລາແຫ່ງຊາດຫລັກ 16 ( ສະຫນາມໃນ )

- ເວລາ 16:00 ສະໂມສອນ ຊ້າງນ້ອຍ ເອັຟຊີ ພົບ ສະໂມສອນ ເອສະຣາ ເອັຟຊີ ແຂ່ງຂັນຢູ່ທີ່ສະຫນາມກິລາແຫ່ງຊາດຫລັກ 16 ( ສະຫນາມນອກ )  

ວັນທີ 12 ກໍລະກົດ 2020 ມີການແຂ່ງຂັນ 1 ຄູ່

- ເວລາ 16:00 ສະໂມສອນ ປກສ ເອັຟຊີ ພົບ ສະໂມສອນ ວຽງຈັນ ເອັຟຊີ ຈາກ ແຂວງວຽງຈັນ ແຂ່ງຂັນຢູ່ທີ່ສະຫນາມກິລາແຫ່ງຊາດຫລັກ 16 ( ສະຫນາມໃນ )

ທຸກໆນັດແມ່ນມີການຖ່າຍທອດສົດຜ່ານທາງ Mycujoo.