League

ສ​ຕ​ລ ຈັດ​ຝຶກ​ອົບ​ກຳ​ມະ​ການ ເພື່ອກຽມ​ຄວາມ​ພ້ອມ​ຕັດ​ສິນ ເປບ​ຊີ ລາວ​ລີກ 1

ສ​ຕ​ລ ຈັດ​ຝຶກ​ອົບ​ກຳ​ມະ​ການ ເພື່ອກຽມ​ຄວາມ​ພ້ອມ​ຕັດ​ສິນ ເປບ​ຊີ ລາວ​ລີກ 1

REFEREE 1

ໃນຕອນເຊົ້າ ວັນພຸດ 01 ກໍລະກົດ 2020 ຢູ່ທີ່ຫ້ອງປະຊຸມ ສະຫະພັນບານເຕະແຫ່ງຊາດລາວ ບ້ານຫ້ວຍຫົງ ເມືອງຈັນທະບູລີ ນະຄອນຫລວງ ໄດ້ມີການຈັດຝຶກອົບຮົມກຳມະການຕັດສິນ ເພື່ອກຽມຄວາມພ້ອມ ຕັດສິນ ການແຂ່ງຂັນບານເຕະ ເປບຊີ ລາວລີກ 1 ປະຈຳປີ 2020 ທີ່ຈະເປີດສາກຂຶ້ນໃນວັນເສົາ 11 ກໍລະກົດ  2020 , ເຂົ້າຮ່ວມໃນພິທີດັ່ງກ່າວໂດຍມີ ທ່ານ ຄຳແພງ ວົງຂັນຕີ ຮອງປະທານ ສະຫະພັນບານເຕະແຫ່ງຊາດລາວ ທັງເປັນຫົວຫນ້າອະນຸກຳມະການຕັດສິນ ສະຫະພັນບານເຕະແຫ່ງຊາດລາວ ,  ທ່ານ ທອງປະເສີດ ພອນສິຣິຍະວົງ ຫົວຫນ້າຄູຝຶກສອນກຳມະການຕັດສິນ, ທ່ານ ໄຊປະເສີດ ພົງຊະນິດ ຫົວຫນ້າພະແນກ ກຳມະການຕັດສິນ, ຜູ້ປະເມີນກຳມະການຕັດສິນ ແລະ ກຳມະການຕັດສິນ ທັງຫມົດ 36 ຄົນ ທີ່ມາຈາກຫລາຍພາກສ່ວນເຊັ່ນ: ສະຫະພັນບານເຕະແຫ່ງຊາດລາວ, ກົມກິລາລະດັບສູງ , ມຊ, ຄະນະວິທະຍາສາດການກິລາ-ກາຍະກຳ, ກະຊວງ ປ້ອງກັນຄວາມສະຫງົບ, ກະຊວງ ປ້ອງກັນປະເທດ, ພະແນກສຶກສາທິການ ແລະ ກິລາ ເມືອງ ໄຊເຊດຖາ, ວິທະຍາໄລ ພະລະສືກສາທົ່ງປົ່ງ, ໂຄສະນາອົບຮົມສູນກາງພັກ, ມສ ຈັນທະບູລີ, ມສ ໂຊກນ້ອຍ ແຂວງສະຫວັນນະເຂດ, ແຂວງວຽງຈັນ ແລະ ແຂວງຈຳປາສັກ ໃນນັ້ນມີກຳມະການຕັດສິນຟີຟາ 3 ຄົນ, ຜູ້ຊ່ວຍກຳມະການຕັດສິນ ຟີຟາ 6 ຄົນ ເປັນຍິງ 1 ຄົນ ນາງ ພຸດສະຫວັນ ຈັນທະວົງ ແລະ ກໍາມະການຕັດສິນຟີຟາ ຟຸດຊໍ 1 ຄົນ.

REFEREE 4


ທ່ານ ຄຳແພງ ວົງຂັນຕີ  ຮອງປະທານສະຫະພັນບານເຕະແຫ່ງຊາດລາວ ໄດ້ກ່າວວ່າ: ການຝຶກອົບໃນຄັ້ງນີ້ກໍເພື່ອເປັນກະກຽມການແຂ່ງຂັນບານເຕະ ເປບຊີ ລາວລີກ 1 ປະຈຳປີ 2020 ຂໍໃຫ້ກຳມະການຕັດສິນ ໃຫ້ເອົາໃຈໃສ່ໃນການຝຶກອົບຮົມ ສຶກສາກົດລະບຽບທີ່ທາງຟີຟາ ປັປປຸງໃຫມ່ ໃຫ້ລະອຽດ ພ້ອມດຽວກັນນັ້ນຍັງໄດ້ເນັ້ນຫນັກໃຫ້ກໍາມະການຈົ່ງຕັ້ງຫນ້າຕັດສິນ ໃຫ້ຄວາມເປັນທຳ ໃນທຸກໆນັດທີ່ລົງທຳການຕັດສິນ.

REFEREE 7

REFEREE 5

 

REFEREE 3

ສຳລັບການຝຶກອົບກຳມະການຕັດສິນ ຈະໄດ້ດຳເນີນການຝຶກນັບຕັ້ງແຕ່ວັນທີ 01 ຫາ 03 ກໍລະກົດ  2020 ໂດຍບັນດາກຳມະການຕັດສິນ ແມ່ນຈະໄດ້ຮຽນຮູ້ ທາງດ້ານທິດສະດີ ແລະ ການປະຕິບັດຕົວຈິງ, ແກ້ໄຂ້ປັບປຸງຂໍ້ຜິດພາດທີ່ຜ່ານມາ ພ້ອມດຽວກັນນັ້ຈະໄດ້ມີການທົດສອບພະລະກຳລັງ.
ການແຂ່ງຂັນ ລາຍການ ເປບຊີ ລາວລີກ 1 ລະດູການ 2020 ນີ້ມີທັງໝົດ 7 ສະໂມສອນເຂົ້າຮ່ວມແຂ່ງຂັນ ປະກອບມີ ສະໂມສອນ ລາວ ໂຕໂຢຕ້າ ເອັຟຊີ ດີກຣີແຊ໋ມ 4 ສະໄໝຊ້ອນ, ສະໂມສອນ ມາສເຕີ້ ເຊເວັ້ນ ເອັຟຊີ, ສະໂມສອນ ປກສ ເອັຟຊີ, ສະໂມສອນ ຊ້າງນ້ອຍ ເອັຟຊີ, ສະໂມສອນ ເອສະຣາ ເອັຟຊີ, ສະໂມສອນ ວຽງຈັນ ເອັຟທີ ແລະ ສະໂມສອນ ວຽງຈັ ເອັຟຊີ ການແຂ່ງຂັນກຳນົດຈະເປີດແຂ່ງຂັນຢ່າງເປັນທາງການໃນວັນທີ 11 ກໍລະກົດ 2020 ຈົນເຖິງ ວັນທີ 03 ຕຸລາ 2020. ນອກຈາກນັ້ນ, ກໍຍັງມີອີກ 1 ລາຍການ ໃຫຍ່ ກໍຄື ແມ່ນ ການແຂ່ງຂັນບານເຕະຊີງຂັນ ສຕລ ປະຈຳປີ 2020 ກໍານົດເອົາ ທີມຈາກລາວລີກ 1 ແລະ ລາວລີກ 2 ລວມທັງໝົດ 21 ທີມ ພ້ອມທັງມາຈັບສະຫຼາກແຂ່ງຂັນ ທີມໃດເສຍຕົກຮອບເລີຍ ລາຍການດັ່ງກ່າວ ຄາດວ່າ ຈະຈັດຂຶ້ນໃນເດືອນສິງຫານີ້.
ການແຂ່ງຂັນໃນປີນີ້ແມ່ນຈະໃຊ້ 2 ສະຫນາມຄື: ສະຫນາມກິລາແຫ່ງຊາດຫລັກ 16 ສະຫນາມໃນ ແລະ ສະຫນາມນອກ .

ຕາຕະລາງການແຂ່ງຂັນອາທິດທຳອິດ

ວັນທີ 11 ກໍລະກົດ 2020 ມີການແຂ່ງຂັນ 2 ຄູ່

- ເວລາ 16:00 ສະໂມສອນ ມາສເຕີ້ ເຊເວັ້ນ ເອັຟຊີ ພົບ ສະໂມສອນ ລາວໂຕໂຢຕ້າ ເອັຟຊີ ແຂ່ງຂັນຢູ່ທີ່ສະຫນາມກິລາແຫ່ງຊາດຫລັກ 16 ( ສະຫນາມໃນ )

- ເວລາ 16:00 ສະໂມສອນ ຊ້າງນ້ອຍ ເອັຟຊີ ພົບ ສະໂມສອນ ເອສະຣາ ເອັຟຊີ ແຂ່ງຂັນຢູ່ທີ່ສະຫນາມກິລາແຫ່ງຊາດຫລັກ 16 ( ສະຫນາມນອກ )  

ວັນທີ 12 ກໍລະກົດ 2020 ມີການແຂ່ງຂັນ 1 ຄູ່

- ເວລາ 16:00 ສະໂມສອນ ປກສ ເອັຟຊີ ພົບ ສະໂມສອນ ວຽງຈັນ ເອັຟຊີ ຈາກ ແຂວງວຽງຈັນ ແຂ່ງຂັນຢູ່ທີ່ສະຫນາມກິລາແຫ່ງຊາດຫລັກ 16 ( ສະຫນາມໃນ )

ທຸກໆນັດແມ່ນມີການຖ່າຍທອດສົດຜ່ານທາງ Mycujoo.

ທ່ານອາດຈະມັກ

ເພີ່ມເຕີມໃນ: League

0 ຄຳ ເຫັນ

Powered by