ເມື່ອວັນທີ 02 ກໍລະກົດ 2020 ຢູ່ທີ່ສະຫນາມຫຍ້າທຽມ ສະຫະພັນບານເຕະແຫ່ງຊາດລາວ ບ້ານຫ້ວຍຫົງ ເມືອງຈັນທະບູລີ ນະຄອນຫລວງ ໄດ້ມີການແຂ່ງຂັນນັດອຸ່ນເຄື່ອງກຽມການແຂ່ງຂັນບານເຕະ ເປບຊີ ລາວລີກ 1 ປະຈຳປີ 2020 ເປັນການພົບກັນລະຫວ່າງ ສະໂມສອນ ວຽງຈັນ ເອັຟຊີ ຈາກ ແຂວງວຽງຈັນ ພົບກັບ ສະໂມສອນ ມາສເຕີ້ ເຊເວັ້ນ ເອັຟຊີ ,ນັດດັ່ງກ່າວທັງ 2 ທີມຕ່າງກໍສົ່ງຜູ້ຫລິ້ນຕົວຫລັກລົງສະຫນາມເຊິ່ງທາງ ວຽງຈັນ ເອັຟຊີ ນຳໂດຍນັກເຕະໃຫມ່ສັນຊາດຍີ່ປຸ່ນ 4 ຄົນຄື: TAKAYA SUGASAWA, SHUTA ISHIO, TAKUYA WATANABE ແລະ KAZU YANAGIDATE ພ້ອມດ້ວຍ ນະລົງລິດ ຈັນທະລັງສີ ກອງຫລັງ ທີມຊາດລາວ ຮຸ່ນອາຍຸບໍ່ເກີນ 19 ປີ ເປັນຕົວຫລັກນຳທີມ, ຂະນະທີ່ ມາສເຕີ້ ເຊເວັ້ນ ນຳໂດຍນັກເຕະປະສົບການສູງ ສາຍຊົນ ຂຸນຊຳນານ, ເກດສະດາ ສຸກສະຫວັນ, ບຸນທະວີ ສີປະສົງ , ສຸກສາຄອນ ບຸນຕາທິບ ເປັນຕົວຫລັກນຳທີມ.
ຜ່ານການແຂ່ງຂັນຜົນປະກົດວ່າ ສະໂມສອນ ວຽງຈັນ ເອັຟຊີ ຈາກ ແຂວງວຽງຈັນ ພົບກັບ ສະໂມສອນ ມາສເຕີ້ ເຊເວັ້ນ ເອັຟຊີ 3-0.
ການແຂ່ງຂັນບານເຕະເປບຊີ ລາວລີກ 1 ກຳນົດຈະເປີດແຂ່ງຂັນຢ່າງເປັນທາງການໃນວັນທີ 11 ກໍລະກົດ 2020 ຈົນເຖິງ ວັນທີ 03 ຕຸລາ 2020. ນອກຈາກນັ້ນ, ກໍຍັງມີອີກ 1 ລາຍການ ໃຫຍ່ ກໍຄື ແມ່ນ ການແຂ່ງຂັນບານເຕະຊີງຂັນ ສຕລ ປະຈຳປີ 2020 ກໍານົດເອົາ ທີມຈາກລາວລີກ 1 ແລະ ລາວລີກ 2 ລວມທັງໝົດ 21 ທີມ ພ້ອມທັງມາຈັບສະຫຼາກແຂ່ງຂັນ ທີມໃດເສຍຕົກຮອບເລີຍ ລາຍການດັ່ງກ່າວ ຄາດວ່າ ຈະຈັດຂຶ້ນໃນເດືອນສິງຫານີ້.
ການແຂ່ງຂັນໃນປີນີ້ແມ່ນຈະໃຊ້ 2 ສະຫນາມຄື: ສະຫນາມກິລາແຫ່ງຊາດຫລັກ 16 ສະຫນາມໃນ ແລະ ສະຫນາມນອກ .
ຕາຕະລາງການແຂ່ງຂັນອາທິດທຳອິດ
ວັນທີ 11 ກໍລະກົດ 2020 ມີການແຂ່ງຂັນ 2 ຄູ່
- ເວລາ 16:00 ສະໂມສອນ ມາສເຕີ້ ເຊເວັ້ນ ເອັຟຊີ ພົບ ສະໂມສອນ ລາວໂຕໂຢຕ້າ ເອັຟຊີ ແຂ່ງຂັນຢູ່ທີ່ສະຫນາມກິລາແຫ່ງຊາດຫລັກ 16 ( ສະຫນາມໃນ )
- ເວລາ 16:00 ສະໂມສອນ ຊ້າງນ້ອຍ ເອັຟຊີ ພົບ ສະໂມສອນ ເອສະຣາ ເອັຟຊີ ແຂ່ງຂັນຢູ່ທີ່ສະຫນາມກິລາແຫ່ງຊາດຫລັກ 16 ( ສະຫນາມນອກ )
ວັນທີ 12 ກໍລະກົດ 2020 ມີການແຂ່ງຂັນ 1 ຄູ່
- ເວລາ 16:00 ສະໂມສອນ ປກສ ເອັຟຊີ ພົບ ສະໂມສອນ ວຽງຈັນ ເອັຟຊີ ຈາກ ແຂວງວຽງຈັນ ແຂ່ງຂັນຢູ່ທີ່ສະຫນາມກິລາແຫ່ງຊາດຫລັກ 16 ( ສະຫນາມໃນ )
ທຸກໆນັດແມ່ນມີການຖ່າຍທອດສົດຜ່ານທາງ Mycujoo.
0 ຄຳ ເຫັນ
ທ່ານຕ້ອງເຂົ້າສູ່ລະບົບເພື່ອໃຫ້ ຄຳ ເຫັນ.