ພາຍຫຼັງ ເອສະຣາ ເອັຟຊີ ກັບມາສ້າງຊື່ສຽງອີກຄັ້ງ ດ້ວຍການຄວ້າແຊ໋ມບານຊີງຂັນປະທານ ສຕລ ປະຈໍາປີ 2019 ຮຸ່ນອາຍຸບໍ່ເກີນ 18 ປີ ໄປແບບສະບາຍໆ ໃນນັດຊີງເອົາຊະນະ ຢູ-18 ຊ້າງນ້ອຍ ເອັບຊີ 4-2 ຄວ້າແຊ໋ມໄປຄອງ ເຊິ່ງນັກເຕະທີ່ໂດດເດັ່ນທີ່ສຸດເປັນ ໂຈນີ ແຫວນປະເສີດ ກອງໜ້າດາວເດັ່ນທີມຊາດລາວ ຍິງຄົນດຽວ 17 ປະຕູ ຂອງລາຍການດັ່ງກ່າວ ກ່ອນຈະປະກາດເຂົ້າຮ່ວມການແຂ່ງຂັນ ເປບຊີ ລາວລີກ 1 ຫຼື ລີກສູງສຸດຂອງ ສປປ ລາວ ລະດູການນີ້ ເຊິ່ງຖືເປັນການຫວນຄືນສູ່ລີກວົງການບານລາວ ໃນຮອບ 4 ປີ.
ຫຼ້າສຸດ ທ່ານ ບ່ຽງ ຊູ ນາ (Byung soo na) ຫົວໜ້າຄູຝຶກຂອງ ເອສຣາ ເອັບຊີ ໃຫ້ສໍາພາດວ່າ: ສໍາລັບ ເອສະຣາ ເອັຟຊີ ຊຸດນີ້ແມ່ນເນັ້ນໃຊ້ນັກກິລາທີມຊາດລາວ ຮຸ່ນອາຍຸບໍ່ເກີນ 19 ປີ ແລະ ທີມຊຸດແຊ໋ມບານເຕະຊີງຂັນ ສຕລ ປະຈໍາປີ 2019 ຮຸ່ນອາຍຸບໍ່ເກີນ 18 ປີ ເຊິ່ງໄດ້ຝຶກຊ້ອມແບບເຕັມຊຸດເກືອບ 3 ອາທິດແລ້ວ, ເຊິ່ງປັດຈຸບັນແມ່ນມີນັກເຕະ 22 ຄົນ ແລະ ຈະໄດ້ເສີມນັກເຕະຊາວເກົາຫຼີ 1 ຄົນ ທີ່ກໍາລັງລໍຖ້າປະເທດເປີດຈະເຂົ້າມາເສີມທີມ ໂດຍເປົ້າໝາຍພວກເຮົາຕັ້ງຕິດ 1 ໃນ 4 ເຂົ້າຮ່ວມລາຍການດັ່ງກ່າວ ດັ່ງທີ່ຮູ້ກັນແລ້ວວ່ານັກເຕະຂອງເອສະຣາ ເອັຟຊີ ຊຸດນີ້ແມ່ນມີອາຍຸຍັງນ້ອຍທຸກຄົນຈະໄປສູ້ກັບທີມໃຫຍ່ ເຊັ່ນ ລາວ ໂຕໂຢຕ້າ ເອັຟຊີ, ມາສເຕີ, ປກສ ເອັຟຊີ ແລະ ທີມອື່ນໆ ກໍຄົງຍາກ. ຢ່າງໃດກໍຕາມ ເຊື່ອວ່າຖ້າຫາກທີມພວກເຮົາສາມາດຈັດລະບົບທີ່ດີ ແລະ ຫຼິ້ນຕາມລະບົບທີ່ວາງໄວ້ ໂດຍສະເພາະການຫຼິ້ນແບບທີມເວີກຊ່ວຍກັນ ພວກເຮົາມີໂອກາດສູ້ໄດ້ທຸກທີມ.
ສຳລັບ ສະໂມສອນ ເອສະຣາ ເອັບຊີ ເປັນສະໂມສອນທີ່ສ້າງນັກກິລາຮຸ່ນສືບທອດ ເຊິ່ງມີນັກກິລາຕິດທີມຊາດ ຫຼາຍຄົນທີ່ສຸດເລີ່ມຈາກຊຸດທໍາອິດ ຄື ສຸກອາພອນ ວົງຈຽງຄໍາ ນັກເຕະລາວ ທີ່ຫຼິ້ນຢູ່ໃນລີກສູງສຸດຂອງປະເທດໄທ ປັດຈຸບັນ ແລະ ສ້າງນັກເຕະເຍົາວະຊົນກ້າວສູ່ທີມຊາດທຸກໆຊຸດ ຈົນເຖິງທີ່ ຊຸດໃຫຍ່ ກ່ອນທີ່ໃນປີ 2019 ເອສະຣາ ເອັຟຊີ ໄດ້ຮັບລາງວັນ ພັດທະນາບານເຕະຮຸ່ນສືບທອດດີເດັ່ນ ຈາກ ສະຫະພັນບານເຕະແຫ່ງຊາດລາວ( LFF Grassroots Award 2019).
ຜົນງານໃນລີກສູງສຸດຂອງ ສປປ ລາວ ທີ່ຜ່ານມາຂອງ ເອສະຣາ ເອັຟຊີ ປີ 2013 ໄດ້ອັນດັບ 4, ປີ 2014 ໄດ້ອັນດັບ 6, ປີ 2015 ໄດ້ອັນດັບ 11 ແລະ ປີ 2016 ໄດ້ອັນດັບ 10 ກ່ອນປີນີ້ຈະກັບມາແຂ່ງຂັນອີກຄັ້ງໂດຍມີ ທ່ານ BYUNG SOO NA ເຊິ່ງລະດູການ 2019 ພາ ມາສເຕີ 7 ເອັຟຊີ ຍາດອັນດັບ 2 ໃນການແຂ່ງຂັນ ເປບຊີ ລາວພຣີເມຍລີກ 2019, ສ່ວນຜົນງານລ່າສຸດພາ ເອສະຣາ ເອັຟຊີ ອຸ່ນເຄື່ອງບຽດຊະນະ ວຽງຈັນ ເອັຟຊີ ໄປຫວຸດຫວິດ 1-0 ແລະ ເອສະຣາ ເອັຟຊີ ສະເຫມີ ກາຣຸດາ ເອັຟຊີ ທີມຈາກລາວລີກ 2 3-3.
ພາບ ແລະ ຂໍ້ມູນ ຈາກ: ສົງກັນ ພັນແພງດີ
0 ຄຳ ເຫັນ
ທ່ານຕ້ອງເຂົ້າສູ່ລະບົບເພື່ອໃຫ້ ຄຳ ເຫັນ.