ສົມຊາຍ ແກ້ວຫານາມ ຍິງປະຕູທີມເກົ່າ ເອສະຣາ ເຮັດໃຫ້ ຊ້າງນ້ອຍ ສະເຫມີ ເອສະຣາ 1-1 ນັດເປີດສະຫນາມເປບຊີ ລາວລີກ 1

ເມື່ອວັນທີ 11 ກໍລະກົດ 2020 ຢູ່ທີ່ສະຫນາມກິລາແຫ່ງຊາດຫລັກ 16 ( ສະຫນາມນອກ ) ໄດ້ມີ ການແຂ່ງຂັນບານເຕະ ເປບຊີ ລາວລີກ 1 ປະຈຳປີ 2020 ນັດເປີດສະຫນາມ ເຊິ່ງເປັນການພົບກັນລະຫວ່າງ ຊ້າງນ້ອຍ ເອັຟຊີ ພົບກັບ ເອສະຣາ ເອັຟຊີ, ເຊິ່ງນັດນີ້ທາງ ຊ້າງນ້ອຍ ໄດ້ສົ່ງຜູ້ຫລິ້ນຕົວຫລັກນຳໂດຍ ຈັນທະຈອນ ທິໂນລາດ ຫົວຫນ້າທີມ, ບຸນພະຈັນ ບຸນກອງ, ອາພີໄຊ ຖານະຂັນຕີ ແລະ ສົມຊາຍ ແກ້ວຫານາມ ຂະນະທີ່ ເອສະຣາ ນຳໂດຍ ພັດທະນາ ພົມມະເທບ, ໄຊຍະພອນ ແສງສະຫວ່າງ ພ້ອມດ້ວຍບັນຜູ້ຫລິ້ນຕົວຫລັກທີມຊາດລາວ ຮຸ່ນອາຍຸບໍ່ເກີນ 19 ປີ ໂຈນີ ແຫວນປະເສີດ ແລະ  ອານຸສອນ ໄຊປັນຍາ.

     ຜ່ານການແຂ່ງຂັນຜົນປະກົດວ່າ ສະໂມສອນ ຊ້າງນ້ອຍ ເອັຟຊີ ສະເຫມີ ສະໂມສອນ ເອສະຣາ ເອັຟຊີ 1-1 ໂດຍ ເອສະຣາ ເອັຟຊີ ໄດ້ປະຕູຂຶ້ນນຳກ່ອນໃນນາທີ 12 ຈາກຈັງຫວະຄວາມຜິດພາດຂອງ ສໍລະສັກ ທິລະວົງ ປັດບານຜິດພາດ ໄປເຂົ້າທາງ ພັດທະນາ ພົມມະເທບ ຍິງເຂົ້າປະຕູໄປຢ່າງສວຍງາມ ເຊິ່ງເປັນປະຕູທຳອິດ ຂອງການແຂ່ງຂັນບານເຕະ ເປບຊີ ລາວລີກ ປະຈຳປີ 2020 ຂະນະທີ່ ສະໂມສອນ ຊ້າງນ້ອຍ ເອັຟຊີ ໄດ້ປະຕູຕີສະເຫມີ ຈາກຈະຫວັງ ບຸນພະຈັນ ບຸນກອງ ເປີດບານ ໄປຫນ້າກອບເກດໂທດ ສົມຊາຍ ແກ້ວຫານາມ ຍິງເຂົ້າຢ່່າງສວຍງາມ ເຮັດໃຫ້ ຊ້າງນ້ອຍ ສະເຫມີ ເອສະຣາ 1-1 ແບ່ງກັນໄປທີມລະຫນຶ່ງ ຄະແນນ.

      ຕາຕະລາງ ການແຂ່ງຂັນນັດທີສອງ ສະໂມສອນ ຊ້າງນ້ອຍ ຈະແຂ່ງຂັນວັນທີ 18 ກໍລະກົດ 2020 ເວລາ 16:00 ແຂ່ງຂັນຢູ່ທີ່ສະຫນາມກິລາແຫ່ງຊາດຫລັກ 16 ( ສະຫນາມໃນ ) ຂະນະທີ່ ເອສະຣາ ຈະລົງສະຫນາມນັດທີສອງ ວັນທີ 19 ກໍລະກົດ 2020 ພົບກັບ ປກສ ເອັຟຊີ ເວລາ 16:00 ແຂ່ງຂັນຢູ່ທີ່ສະຫນາມກິລາແຫ່ງຊາດຫລັກ 16 ( ສະຫນາມໃນ ).