ເປບຊີ ລາວລີກ 1 ອາທິດທຳອິດ ມີ ປະຕູເກີດຂຶ້ນທັງຫມົດ 7 ປະຕູ ໂດຍບໍ່ມີນັກກິລາຕ່າງປະເທດຍິງປະຕູໄດ້

     ຜ່ານໄປແລ້ວສຳລັບ ການແຂ່ງຂັນບານເຕະ ເປບຊີ ລາວລີກ 1 ອາທິດທຳອິດ ເຊິ່ງໄດ້ເລີ້ມການແຂ່ງຂັນ ວັນເສົາ 11 ກໍລະກົດ 2020 ທີ່ຜ່ານມາ ໂດຍມີການແຂ່ງຂັນທັງຫມົດ 2 ຄູ່ ຄື: ມາສເຕີ້ ເຊເວັ້ນ ເອັຟຊີ ສະເຫມີ ລາວໂຕໂຢຕ້າ 1-1 ແລະ ຊ້າງນ້ອຍ ເອັຟຊີ ສະເຫມີ ເອສະຣາ ເອັຟຊີ 1-1, ຂະນະທີ່ ວັນອາທິດ 12 ກໍລະກົດ 2020 ມີການແຂ່ງຂັນ 1 ຄູ່ ປກສ ເອັຟຊີ ເອົາຊະນະ ວຽງຈັນ ເອັຟຊີ ຈາກແຂວງວຽງຈັນ  2-1 ເຊິ່ງການແຂ່ງຂັນທຸກຄູ່ ແມ່ນມີປະຕູເກີດຂຶ້ນທັງຫມົດ, ອາທິດທຳອິດມີປະຕູເກີດຂຶ້ນທັງຫມົດ 7 ປະຕູ ໂດຍ 7 ປະຕູບໍ່ມີນັກເຕະຕ່າງປະເທດຍິງປະຕູ ເຊິ່ງຜູ້ຍິງປະຕູທັງຫມົດເປັນນັກເຕະສັນຊາດລາວ, ຜູ້ຍິງປະຕູສູງສຸດປະຈຳອາທິດ ແມ່ນ ສຸລິພອນ ໄຊປັນຍາ ກອງຫນ້າ ຈາກ ສະໂມສອນ ປກສ ເອັຟຊີ ນັກເຕະມາຈາກ ແຂວງອຸດົມໄຊ ຍິງໄດ້ 2 ປະຕູ ຈະໄດ້ຮັບເງິນ 1.000.000 ກີບ ຈາກ ບໍລິສັດ ອີອອນ ບໍລິການເຊົ່າສິນເຊື່ອ ( ລາວ ) ຈຳກັດ ( AEON ), ຂະນະທີ່ ຜູ້ຍິງໄດ້ 1 ປະຕູ ຈຳນວນ 5 ຄົນ ມີຄື: ພັດທະນາ ພົມມະເທບ ຈາກ ສະໂມສອນ ເອສຣາ ເອັຟຊີ, ສົມຊາຍ ແກ້ວຫານາມ ຈາກ ສະໂມສອນ ຊ້າງນ້ອຍ ເອັຟຊີ, ໂລ້ ວີພັດ ຈາກ ສະໂມສອນ ລາວໂຕໂຢຕ້າ, ກຽງທະວີສັກ ໄຊຊະນະປັນຍາ ຈາກ ສະໂມສອນ ມາສເຕີ້ ເຊເວັ້ນ ເອັຟຊີ  ແລະ ພຸດ ໄມພອນ ຈາກ ສະໂມສອນ ວຽງຈັນ ເອັຟຊີ, ສ່ວນ ຈຳນວນບັດເຫລືອງ ທີ່ກຳມະການ ແຈກບັດເຫລືອງ ມີທັງຫມົດ 13 ບັດ ໃນນັ້ນນັດ ມາສເຕີ້ ເຊເວັ້ນ ພົບ ລາວໂຕໂຢຕ້າ ຈຳນວນ 6 ບັດ, ຊ້າງນ້ອຍ ພົບ ເອສະຣາ ຈຳນວນ 5 ບັດ ແລະ ປກສ ພົບ ວຽງຈັນ ຈາກ ແຂວງວຽງຈັນ ຈຳນວນ 2 ບັດ. 

     ສຳລັບຕາຕະລາງ ການແຂ່ງຂັນໃນອາທິດທີ 2, ວັນເສົາ  18 ກໍລະກົດ 2020 ມີການແຂ່ງຂັນ 2 ຄູ່ຄື: ເວລາ 16:00 ສະໂມສອນ ລາວໂຕໂຢຕ້າ ເອັຟຊີ ພົບ ສະໂມສອນ ຊ້າງນ້ອຍ ເອັຟຊີ ແຂ່ງຂັນຢູ່ທີ່ສະຫນາມກິລາແຫ່ງຊາດຫລັກ 16 ( ສະຫນາມໃນ ), ເວລາ 16:00 ວຽງຈັນ ເອັຟຊີ ຈາກ ແຂວງວຽງຈັນ ພົບ ວຽງຈັນ ເອັຟທີ ແຂ່ງຂັນຢູ່ທີ່ສະຫນາມກິລາແຫ່ງຊາດຫລັກ 16 ( ສະຫນາມນອກ ) ສ່ວນ ວັນອາທິດ 19 ກໍລະກົດ 2020 ເວລາ 16:00 ເອສະຣາ ເອັຟຊີ ພົບ ປກສ ເອັຟຊີ ເອັຟຊີ ແຂ່ງຂັນຢູ່ທີ່ສະຫນາມກິລາແຫ່ງຊາດຫລັກ 16 ( ສະຫນາມໃນ ) ເຊິ່ງທຸກໆຄູ່ແມ່ນອະນຸຍາດໃຫ້ແຟນບານເຂົ້າຮ່ວມຮັບຊົມການແຂ່ງຂັນໄດ້ແຕ່ຕ້ອງຮັກສາໄລຍະຫ່າງ 1 ແມ໋ດ ຂຶ້ນໄປ, ສາມາດຕິດຕາມການຖ່າຍທອດສົດທາງ Mycujoo, ພິເສດໄປກວ່ານັ້ນໃນປີນີ້ແຟນບານສາມາດຕິດຕາມຄວາມເຄື່ອນໄຫວການແຂ່ງຂັນບານເຕະ ເປບຊີ ລາວລີກ 1 ໄດ້ຜ່ານເວບໄຊ www.laoleague.com ແລະ Appication ຢູ່ໃນມືຖີຂອງ ທ່ານພຽງແຕ່ເຂົ້າໄປທີ່ Apple Store ພຽງແຕ່ພິມຄ່າ LFF ຫລັງຈາກນັ້ນຕິດຕັ້ງ ສາມາດຕິດການເຄື່ອນໄຫວ ການແຂ່ງຂັນແບບທັນເຫດການ ສ່ວນ Androind ແມ່ນຈະມີໃນໄວໆນີ້.