ພັດ​ທະ​ນາ, ໂຈ​ນີ, ອາ​ນຸ​ສອນ ນຳ​ທັບ ເອ​ສະ​ຣາ ເອັ​ຟ​ຊີ ລຸຍ ​ເປ​ບ​ຊີ ​ລາວ​ລີກ 1

            ທ່ານ ມີດືມ ຄິມ ( Mideum Kim ) ສັນຊາດ ສ.ເກົາຫລີ ຜູ້ຈັດການທີມ ເອສະຣາ ເອັຟຊີ ໄດ້ລາຍງານກະກຽມທີມໃຫ້ຮັບຮູ້ວ່າ : ມາຮອດປັດຈຸບັນ ສະໂມສອນ ເອສະຣາ ເອັຟຊີ ແມ່ນມີການກະກຽມຄວາມພ້ອມເກືອບ 80 % ເຊິ່ງໄດ້ເລີ້ມການຝຶກຊ້ອມມາຕັ້ງແຕ່ຕົ້ນເດືອນມັງກອນ ໂດຍຍັງມີບາງນັກກິລາມີອາການບາດເຈັບຈາກເກມອຸ່ນເຄື່ອງ, ເຊິ່ງໃນປີນີ້ ເອສະຣາ ຈະໃຊ້ສະຫນາມ ມຊ ເປັນສະຫນາມເຈົ້າບ້ານ, ສ່ວນຄູຝຶກຍັງໃຊ້ ທ່ານ ບຽງຊູນາ ( NA BYUNG SOO ) ສັນຊາດ ສປປ ເກົາຫລີ ເປັນຫົວຫນ້າຄູຝຶກ ຂະນະທີ່ ນັກກິລາ ເອສະຣາ ໃນປີນີ້ໄດມີການເສີມນັກເຕະດາວຮຸ່ງຂອງ ສະໂມສອນ ຈຳນວນ 2 ຄົນ ແລະ ນັກເຕະຈາກ ສະໂມສອນ ອື່ນ 3 ຄົນຄື: ທຽນທັນວາ ສີຈຳປາ ກອງຫນ້າ ທີມຊາດລາວ ຮຸ່ນອາຍຸບໍ່ເກີນ 19 ປີ ຈາກ ສະໂມສອນ ເຄພີເອັສ ເອັຟຊີ, ຊະນະໄຊ ສອນທະວົງ ຜູ້ຮັກສາປະຕູ ຈາກ ສະໂມສອນ ທຣີນີຕີ ເອັຟຊີ ແລະ ອານຸພາບ ໄຊຍະລໍ່ ຈາກ ສະໂມສອນ ເຄພີເອັສ ເອັຟຊີ.

ທ່ານ ບຽງຊູນາ ( NA BYUNG SOO ) ສັນຊາດ ສປປ ເກົາຫລີ 

ສຳລັບລາຍຊື່ 19 ນັກກິລາ ສະໂມສອນ ເອສະຣາ ເອັຟຊີ ມີດັ່ງນີ້:
- ຜູ້ຮັກສາປະຕູ: ຈັນທະວິໄຊ ທຽບອານົງ, ຊະນະໄຊ ສອນທະວົງ 
- ກອງຫລັງ: ອານັນຕະຊາ ສີພົງພັນ, ພຸດທະວົງ ສັງວິໄລ, ທິນນະກອນ ກ້ອງຕະການ, ວັນນະເດດ ນວນມະນີອົບ, ອຸ່ນ ເພັດວົງສາ, ອານຸພາບ ໄຊນະລໍ່, ທະນາກອນ ມະໄລທອງ
- ກອງກາງ: ພັດທະນາ ພົມມະເທບ, ເລັກໂຕ ຫລວງອາໄພ, ສຸນິກອນ ສຸພູສິດ, ພຸດທະລັກ ທອງຊະນິດ, ສິງທອງ ສິຍະວົງ, ພອນປະເສີດ ມີຈະເລີນ
- ກອງຫນ້າ: ສະເຫລີມໄຊ ພົມມະວົງ, ໂຈນີ ແຫວນປະເສີດ, ອານຸສອນ ໄຊປັນຍາ, ທຽນທັນວາ ສີຈຳປາ

            ການແຂ່ງຂັນບານເຕະ ເປບຊີ ລາວລີກ 1 2021 ມີ ທັງຫມົດ 6 ສະໂມສອນ ເຂົ້າຮ່ວມປະກອບມີ : ສະໂມສອນ ເອັຟຊີ ຈັນທະບູລີ, ສະໂມສອນ ປກສ ເອັຟຊີ,ສະໂມສອນ ຊ້າງນ້ອຍ ເອັຟຊີ,ສະໂມສອນ ເອສະຣາ ເອັຟຊີ,ສະໂມສອນ ວຽງຈັນ ເອັຟຊີ ຈາກແຂວງວຽງຈັນ ແລະ ສະໂມສອນ ກອງທັບ ເອັຟຊີ (ເລຶ່ອນຂຶ້ນມາຈາກ ແຊ້ມ ລິກ 2 , 2020). ການແຂ່ງຂັນແມ່ນຈະເປີດສາກໃນວັນທີ 27 ມີນາ 2021 ຮູບແບບການແຂ່ງຂັນ ແມ່ນຈະແຂ່ງແບບ 3 ຮອບຄື: ຮອບຂາໄປ, ຮອບຂາກັບ ແລະ ຮອບ 3.