ແກ້ວມະ​ນີ ແພງ​ເມືອງ​ຄຸນ ກຳມະການຕັດສິນຟີຟາ ຍິງລາວຄົນທໍາອິດ

                 ນາງ ແກ້ວມະນີ ແພງເມືອງຄູນ ອາຍຸ 26 ປີ ເກີດຢູ່ບ້ານຫ້ວຍນ້ຳເຢັນ ເມືອງນາຊາຍທອງ ນະຄອນຫລວງວຽງຈັນ ໄດ້ໃຊ້ເວລາ 4 ປີໃນການຝຶກຊ້ອມ ແລະ ຮຽນການເປັນກໍາມະການ ກ່ອນຈະສາມາດກ້າວສູ່ບົດບາດການເປັນກໍາມະການຕັດສິນລະດັບ ຟີຟາ ໃນປີ 2021 ແລະ ເປັນມີລາຍຊື່ຕັດສິນ ການແຂ່ງຂັນບານເຕະ ເປບຊີ ລາວລີກ 1 ປະຈຳປີ 2021, ນາງ ແກ້ວມະນີ ແພງເມືອງຄູນ ເປີດເຜີຍວ່າ: ກ່ອນຈະໄດ້ມາເປັນ ກຳມະການ ແມ່ນຕ້ອງໄດ້ຜ່ານການຝືກອົບຮົມຂັ້ນພື້ນຖານ ແລະ ເລີ່ມຕັດສິນລີກຜູ້ຍິງ ຈາກນັ້ນຈິ່ງເຂົ້າຮ່ວມຝຶກອົບຮົມຍົກລະດັບ ເຂົ້າຮ່ວມຕັດສິນໃນ ລາວລີກ 2 ( ຜູ້ຊາຍ ) ແລະ ເລີ່ມຕັດສິນລີກຜູ້ຊາຍບໍ່ວ່າຈະເປັນການແຂ່ງຂັນບານເຕະ ຢູ 12, ຢູ 15, ຢູ 18, ລາວລີກ 2 ແລະ ຟຸດຊໍລີກ, ແນ່ນອນໃນການເປັນກຳມະການຮ່າງກາຍຕ້ອງພ້ອມ ແລະ ຟິດຮ່າງກາຍຢູ່ຕະຫຼອດ ໂດຍສະເພາະດ້ານພະລະກຳລັງ ແລະ ຮູ້ກະຕິກາ ໃນການລົງຕັດສິນທຸກໆນັດແມ່ນມີຄວາມສຳຄັນທີ່ສຸດ. “ ສໍາລັບ ນ້ອງເລີ່ມເຂົ້າເປັນກໍາມະການຕັດສິນບານເຕະໃນ ສປປ ລາວ ຢ່າງເຕັມຕົວ ເມື່ອປີ 2017 ຫຼັງຈາກທີ່ໄດ້ເຂົ້າຝຶກອົບຮົມ ແລະ ຝຶກຊ້ອມການເປັນກໍາມະການຢ່າງໜັກ ເຊິ່ງທີ່ຜ່ານມາກໍເລີ່ມຈາກການຕັດສິນບານເຕະເຍົາວະຊົນ ແລະ ພະຍາຍາມເຮັດໃຫ້ດີທີ່ສຸດ ແລະ ຮຽນຮູ້ໃນທຸກໆນັດ ໃນທຸກນັດທີ່ລົງຕັດສິນບໍ່ວ່າຈະນ້ອຍ ຫຼື ໃຫຍ່ ຈົນກ້າວສູ່ການເປັນກໍາມະຕັດສິນທີ່ໄດ້ຮອງຮັບຈາກ ຟີຟາ ແລະ ແນ່ນອນຕໍ່ໄປນ້ອງກໍຈະສືບຕໍ່ຮັກສາສະພາບຮ່າງກາຍໃຫ້ພ້ອມຕະຫຼອດເວລາ ລວມເຖິງສືບຕໍ່ສຶກສາກົດລະບຽບກະຕິກາຕ່າງຢູ່ສະເໝີ ” ແກ້ວມະນີ ກ່າວ. ສໍາລັບ ແກ້ວມະນີ ເກີດວັນທີ 18 ມີນາ 1995 ກາຍເປັນຍິງຄົນທໍາອິດໃນປະຫວັດສາດ ທີ່ເສັງຜ່ານກໍາມະການຕັດສິນ ລະດັບຟີຟາ ຂອງ ສປປ ລາວ ເຊິ່ງໃນປີ 2021 ຟີຟາ ໄດ້ປະກາດກໍາມະການລາວຈໍານວນ 11 ຄົນທີ່ເສັງຜ່ານລະດັບຟີຟາ ໂດຍໃນ 11 ຄົນມີຍິງ 2 ຄົນ, ສ່ວນອີກຄົນໜຶ່ງຊື່ ທ່ານ ນາງ ພຸດສະຫວັນ ຈັນທະວົງ ເປັນຜູ້ຊ່ວຍກໍາມະການຕັດສິນຍິງຂອງ ຟີຟາ.

                  ການແຂ່ງຂັນບານເຕະ ເປບຊີ ລາວລີກ 1 2021 ມີ ທັງຫມົດ 6 ສະໂມສອນ ເຂົ້າຮ່ວມປະກອບມີ : ສະໂມສອນ ເອັຟຊີ ຈັນທະບູລີ, ສະໂມສອນ ປກສ ເອັຟຊີ,ສະໂມສອນ ຊ້າງນ້ອຍ ເອັຟຊີ,ສະໂມສອນ ເອສະຣາ ເອັຟຊີ,ສະໂມສອນ ວຽງຈັນ ເອັຟຊີ ຈາກແຂວງວຽງຈັນ ແລະ ສະໂມສອນ ກອງທັບ ເອັຟຊີ (ເລຶ່ອນຂຶ້ນມາຈາກ ແຊ້ມ ລິກ 2 , 2020). ການແຂ່ງຂັນແມ່ນຈະເປີດສາກໃນວັນທີ 27 ມີນາ 2021 ຮູບແບບການແຂ່ງຂັນ ແມ່ນຈະແຂ່ງແບບ 3 ຮອບຄື: ຮອບຂາໄປ, ຮອບຂາກັບ ແລະ ຮອບ 3.