ກອງ​ທັບ ເອັ​ຟ​ຊີ ເສີມ​ຄວາມ​ແຂງ​ແກ່ນ ຄວ້າ​ຕົວ 2 ນັກ​ເຕະ ທີມ​ຊາດ​ລາວ ຮຸ່ນ​ອາ​ຍຸ 19 ປີ ມາ​ຮ່ວມ​ທີມ

            ສະໂມສອນ ກອງທັບ ເອັຟຊີ ແຊ້ມການແຂ່ງຂັນ ລາວລີກ 2 ປະຈຳປີ 2019 ໄດ້ສິດເລື່ອນຊັ້ນຂຶ້ນລີກສູງສຸດຂອງປະເທດ ລາວລີກ 1 ຄວ້າຕົວນັກ 2 ທີມຊາດລາວ ຮຸ່ນອາຍຸບໍ່ເກີນ 19 ປີ ຊີດີ ພົມສຸວັນ ຕຳແຫນ່ງກອງຫລັງ ຈາກ ສະໂມສອນ ເອສະຣາ ເອັຟຊີ ແລະ ກ້ວຍເຈັ໋ງ ຫນູພັກດີ ຈາກແຂວງຈຳປາສັກ ເຊິ່ງທັງ 2 ນັກເຕະ ຕາງກໍມີຜົນງານດີຫລິ້ນໃຫ້ກັບ ສະໂມສອນ ແລະ ທີມຊາດລາວ ໂດຍສະເພາະ ຊີດົມ ພົມສະຫວັນ ນັກເຕະລູນຫລານຊາວແຂວງສະຫວັນນະເຂດ ລົງສະຫນາມໃຫ້ກັບ ເອສະຣາ ເອັຟຊີ ລາວລີກ 1 ທັງຫມົດ  10 ນັດ ພາ ເອສະຣາ ເອັຟຊີ ໄດ້ອັນດັບ 4 ສ່ວນການແຂ່ງຂັນບານເຕະ ຊີງຂັນ ສະຫະພັນບານເຕະແຫ່ງຊາດລາວ LFF CUP 2019 ລົງສະຫນາມໃຫ້ກັບ ເອສະຣາ 3 ນັດພາ ເອສະຣາ ໄດ້ຜ່ານເຂົ້າສູ່ຮອບຮອງຊະນະເລີດ, ຂະນະທີ່ ກ້ວຍເຈັ໋ງ ຫນູພັກດີ ມີຜົນງານໄດ້ໂດດເດັ່ນເຊັ່ນດຽວກັນຕິດ ທີມຊາດລາວ ຮຸ່ນອາຍຸບໍ່ເກີນ 19 ປີ  ນັບຕັ້ງແຕ່ປີ 2019 ຮອດປັດຈຸບັນ, ສຳລັບຜົນງານ ກ້ວຍເຈັ໋ງ ລ່າສຸດຫລິ້ນໃຫ້ກັບ ແຂວງຈຳປາສັກ ໃນລາຍການແຂ່ງຂັນເພື່ອຂ່ຳນັບຮັບຕ້ອນວັນຊາດທີ 2 ທັນວາ ຄົບຮອບ 45 ປີ ພາ ແຂວງ ຈຳປາສັກ ຄວ້າແຊ້ມ ການແຂ່ງຂັນໄດ້ສຳເລັດ ໂດຍລົງສະຫນາມທັງຫມົດ 7 ນັດ ຍິງ 2 ປະຕູ. 

            ນອກຈາກການຄວ້າຕົວ 2 ນັກເຕະ ທີມຊາດລາວ ຮຸ່ນອາຍຸ 19 ປີ ແລ້ວ ກອງທັບ ຍັງໄດ້ຄວ້າຕົວ ໄຊຍະພອນ ແສງສະຫວ່າງ ຈາກ ສະໂມສອນ ເອສະຣາ, ຊະນະສຸກ ປະວັນນາ ຈາກ ສະໂມສອນ ວຽງຈັນ ເອັຟທີ  ແລະ ນັກເຕະຫນ້າໃຫມ່ຫລາຍຄົນ ປະສົມປະສານກັບນັກເຕະທີ່ມີປະສົບການ ພູທອນ ອິນນະໄລ, ພິມມະສອນ ຈຳປາທອງ, ສຸກສະຫວັນ ໄຊຍະລິນ, ແກ້ວອຸດອນ ສຸວັນນະສັງໂສ ແລະ ຕີ ສີຫາລາດ. 
            ການແຂ່ງຂັນບານເຕະ ເປບຊີ ລາວລີກ 1 ປະຈຳປີ 2021 ທີ່ມີກຳນົດເລີ່ມແຂ່ງຂັນວັນທີ 06 ມີນາ 2021 ນັ້ນຖືກເລື່ອນໄປເລີ່ມແຂ່ງຂັນໃນວັນທີ 27 ມີນາ 2021 ແທນໂດຍອີງຕາມເຫດຜົນດັ່ງລຸ່ມນີ້: 
- ການເລີ່ມຕົ້ນການແຂ່ງຂັນຕ້ອງເລື່ອນອອກໄປເພື່ອລໍຖ້າແຈ້ງການອະນຸຍາດຈັດການແຂ່ງັນ ຈາກລັດຖະບານ.
- ສະໂມສອນໃນການແຂ່ງຂັນ ແລະ ພາກສ່ວນພາຍນອກທີ່ກ່ຽວຂ້ອງກັບການຈັດການແຂ່ງຂັນຍັງບໍ່ທັນມີຄວາມພ້ອມທີ່ສຳລັບການແຂ່ງຂັນ. 
            ເປບຊີ ລາວລີກ 1 2021 ມີ ທັງຫມົດ 6 ສະໂມສອນ ເຂົ້າຮ່ວມປະກອບມີ : ສະໂມສອນ ເອັຟຊີ ຈັນທະບູລີ,ສະໂມສອນ ປກສ ເອັຟຊີ, ສະໂມສອນ ຊ້າງນ້ອຍ ເອັຟຊີ, ສະໂມສອນ ເອສະຣາ ເອັຟຊີ, ສະໂມສອນ ວຽງຈັນ ເອັຟຊີ ຈາກແຂວງວຽງຈັນ ແລະ  ສະໂມສອນ ກອງທັບ ເອັຟຊີ (ເລຶ່ອນຂຶ້ນມາຈາກ ແຊ້ມ ລິກ 2 , 2020) ຮູບແບບການແຂ່ງຂັນ ແມ່ນຈະແຂ່ງແບບ 3 ຮອບຄື: ຮອບຂາໄປ, ຮອບຂາກັບ ແລະ ຮອບ 3.

ສຳລັບລາງວັນ:

- ອັນດັບ 1 ໄດ້ຮັບເງິນລາງວັນ 300,000,000 ກີບ ພ້ອມຂັນ 1 ໜ່ວຍ ແລະ ຫຼຽນຊະນະເລີດ 35 ຫຼຽນ,

- ອັນດັບ 2 ໄດ້ຮັບເງິນລາງວັນ 150.000.000 ກີບ,

- ອັນດັບ 3 ໄດ້ຮັບເງິນລາງວັນ 80.000.000 ກີບ,

- ອັນດັບ 4 ໄດ້ຮັບເງິນລາງວັນ 40.000.000 ກີບ,

- ອັນດັບ5 ໄດ້ຮັບເງິນລາງວັນ 30.000.000 ກີບ

ລວມເງິນລາງວັນການແຂ່ງຂັນ ທັງຫມົດ 1 ຕື້ກວ່າກີບ