ສະ​ໂມ​ສອນ​ບານ​ເຕະ​ກອງ​ທັບ ຖະ​ແຫລງ​ຂ່າວ ແລະ ເຊັນ​ສັນ​ຍາ​ຜູ້​ສະ​ຫ​ນັບ​ສະ​ຫ​ນູນ

 

   

 

          ໃນຕອນບ່າຍ ຂອງວັນທີ 3 ມີນາ 2021 ສະໂມສອນບານເຕະກອງທັບໄດ້ຈັດພິທີຖະແຫຼ່ງຂ່າວເປີດໂຕ ການກະກຽມຄວາມພ້ອມຂອງທີມເຂົ້າຮ່ວມແຂ່ງຂັນບານເຕະ ເປບຊີ ລາວພຣີເມຍລີກ ປະຈຳປີ 2021 ແລະ ພິທີເຊັນສັນຍາສະໜັບສະໜູນເຄື່ອງແຂ່ງຂັນ ລະຫວ່າງ ສະໂມສອນບານເຕະກອງທັບ ກັບ ບໍລິສັດ ໝາຍເວ ສະປອດແວ ຂຶ້ນທີ່ຫ້ອງຮັບແຂກສະໜາມກິລາກອງທັບ ຫຼັກ5 ບ້ານຈອມມະນີ, ເມືອງໄຊເສດຖາ, ນະຄອນຫຼວງວຽງຈັນ.

 

 

 

 

          ໂດຍການໃຫ້ກຽດເຂົ້າຮ່ວມເປັນປະທານ ຂອງທ່ານ ພົຈ ພັນແສງ ບຸນພັນ ຫົວໜ້າກົມອົບຮົມ ກົມໃຫຍ່ເສນາທິການກອງທັບ, ມີທ່ານ ພັທ ທອງພັນ ພັນທະຍາ ຮອງຫົວໜ້າການທະຫານກອງກິລາກອງທັບ ປະທານ ສະໂມສອນບານເຕະກອງທັບ, ມີທ່ານ ພຸດທະສອນ ສີວິໄຊ ປະທານ ບໍລິສັດ ໝາຍເວ ສະປອດແວ ພ້ອມດ້ວຍທີ່ປຶກສາຂອງບໍລິສັດພ້ອມຄະນະ, ມີຄະນະພັກ-ຄະນະບັນຊາກອງກິລາກອງທັບ ພ້ອມດ້ວຍຄູຝຶກ, ນັກກິລາ ຕະຫຼອດເຖິງນັກຂ່າວສື່ມວນຊົນຈາກພາກສ່ວນຕ່າງໆເຂົ້າຮ່ວມເປັນສັກຂີພິຍານຢ່າງພ້ອມພຽງ.

 

 

 

           ທ່ານ ພັທ ທອງພັນ ພັນທະຍາ ໄດ້ຂຶ້ນຜ່ານບົດລາຍງານຫຍໍ້ ກ່ຽວກັບການກະກຽມຄວາມພ້ອມໃນການເຂົ້າຮ່ວມແຂ່ງຂັນ ເຊິ່ງໄດ້ຍົກເຫັນການຫ້າງຫາກະກຽມຄວາມພ້ອມໃນທຸກດ້ານ ໂດຍໄດ້ຄັດເລືອກເອົານັກກິລາດີເດັ່ນຈາກກົມກອງອ້ອມຂ້າງກະຊວງປ້ອງກັນປະເທດ ແລະ ກົມກອງທ້ອງຖິ່ນເຂົ້າຝຶກຊ້ອມແຂ່ງຂັນ ເພື່ອຍົກລະດັບທາງດ້ານເຕັກນິກການຫຼີ້ນແຕ່ລະຕຳແໜ່ງ ແລະ ຂອດປະສານງານທາງດ້ານຍຸດທະວິທີໃຫ້ມີຄວາມຄ່ອງແຄ້ວ, ວ່ອງໄວດ້ານການບຸກ ແລະ ການປ້ອງກັນ, ຍົກສູງປະສິດທະພາບເພື່ອຮັບປະກັນໄຊຊະນະໃນການລົງແຂ່ງຂັນແຕ່ລະນັດ, ຫຼີກລ້ຽງບໍ່ໃຫ້ມີບັດເຫຼືອງ ຫຼື ບັດແດງ, ມີຄວາມປອດໄພ 100% ແລະ ວາງຄາດໝາຍຕິດຢູ່ໃນ ອັນດັບ 3 ຫຼື 4 ໃນຈຳນວນທີມການແຂ່ງຂັນທັງໝົດ.

ໃນໂອກາດຕໍ່ມາກໍ່ຍັງໄດ້ຮ່ວມລົງນາມເຊັນສັນຍາສະໜັບສະໜູນເຄື່ອງແຂ່ງຂັນກິລາ ລະຫວ່າງ ສະໂມສອນກອງທັບ ກັບ ບໍລິສັດ ໝາຍເວສະປອດແວ ເຊິ່ງເປັນບໍລິສັດທີ່ຮັບອອກແບບແລະຜະລິດຊຸດກິລາ, ຝ່າຍສະໂມສອນກອງທັບລົງນາມໂດຍ ທ່ານ ພັທ ທອງພັນ ພັນທະຍາ ປະທານສະໂມສອນກອງທັບ ແລະ ທ່ານ ພຸດທະສອນ ສີວິໄຊ ປະທານ ບໍລິສັດ ໝາຍເວ ສະປອດແວ, ໃນນັ້ນ ບໍສິສັດ ຍັງໄດ້ມອບເຄື່ອງສະໜັບສະໜຸນໃຫ້ແກ່ທີມ ບານເຕະກອງທັບ ລວມມູນຄ່າ 20.000.000 ກວ່າກີບ.

 

          ໃນຕອນທ້າຍ ພິທີຍັງໄດ້ຮັບຟັງການໂອ້ລົມ ຈາກປະທານ ເຊິ່ງທ່ານໄດ້ກ່າວຍ້ອງຍໍຊົມເຊີຍ ແລະ ກ່າວຂອບອົກຂອບໃຈ ມາຍັງບໍລິສັດ ໝາຍເວ ທີ່ໄດ້ປະກອບສ່ວນສະໜັບສະໜູນເຄື່ອງແຂ່ງຂັນກິລາໃຫ້ແກ່ທີມສະໂມສອນກອງທັບ ໃນຄັ້ງນີ້ ແລະ ຫວັງວ່າຈະມີຄັ້ງຕໍ່ໆໄປ, ທ່ານຍັງໄດ້ຮຽກມາຍັງຄະນະນຳ, ຄູຝຶກ, ນັກກິລາ ຈົ່ງເອົາໃຈໃສ່ ຍົກສູງຄວາມຮັບຜິດຊອບຂອງຕົນໃຫ້ສູງຂຶ້ນ ເພື່ອພ້ອມກັນເຮັດສຳເລັດໜ້າທີ່ການເມືອງທີ່ການຈັດຕັ້ງຂັ້ນເທິງມອບໝາຍໃຫ້.

ການແຂ່ງຂັນເປບຊີ ລາວລີກ 1 ປະຈຳປີ 2021 ມີ ທັງຫມົດ 6 ສະໂມສອນ ເຂົ້າຮ່ວມປະກອບມີ : ສະໂມສອນ ເອັຟຊີ ຈັນທະບູລີ ເອັຟຊີ ,ສະໂມສອນ ປກສ ເອັຟຊີ, ສະໂມສອນ ຊ້າງນ້ອຍ ເອັຟຊີ, ສະໂມສອນ ເອສະຣາ ເອັຟຊີ, ສະໂມສອນ ວຽງຈັນ ເອັຟຊີ ຈາກແຂວງວຽງຈັນ ແລະ ສະໂມສອນ ກອງທັບ ເອັຟຊີ (ເລຶ່ອນຂຶ້ນມາຈາກ ແຊ້ມ ລິກ 2 , 2020) ຮູບແບບການແຂ່ງຂັນ ແມ່ນຈະແຂ່ງແບບ 3 ຮອບຄື: ຮອບຂາໄປ, ຮອບຂາກັບ ແລະ ຮອບ 3. ເຊິ່ງຈະເລີ່ມແຂ່ງຂັນໃນວັນທີ 27 ມີນາ 2021 ເປັນຕົ້ນໄປ

ສຳລັບລາງວັນ:

- ອັນດັບ 1 ໄດ້ຮັບເງິນລາງວັນ 300,000,000 ກີບ ພ້ອມຂັນ 1 ໜ່ວຍ ແລະ ຫຼຽນຊະນະເລີດ 35 ຫຼຽນ,

- ອັນດັບ 2 ໄດ້ຮັບເງິນລາງວັນ 150.000.000 ກີບ,

- ອັນດັບ 3 ໄດ້ຮັບເງິນລາງວັນ 80.000.000 ກີບ,

- ອັນດັບ 4 ໄດ້ຮັບເງິນລາງວັນ 40.000.000 ກີບ,

- ອັນດັບ5 ໄດ້ຮັບເງິນລາງວັນ 30.000.000 ກີບ

ລວມເງິນລາງວັນການແຂ່ງຂັນ ທັງຫມົດ 1 ຕື້ກວ່າກີບ