ສະໂມສອນ ເອສະຣາ ເອັຟຊີ ເສີມຄວາມແຂງແກ່ນ ແດນຫນ້າ ຄວ້າຕົວ ທຽນທັນວາ ສີຈຳປາ ກອງຫນ້າ ທີມຊາດລາວ ຮຸ່ນອາຍຸບໍ່ເກີນ 19 ປີ ຈາກ ສະໂມສອນ ເຄພີເອັສ ມາຮ່ວມທີມ, ເຊິ່ງ ທຽນທັນວາ ຖືເປັນກອງຫນ້າທີ່ມີຄວາມໄວມີຄວາມສາມາດ ຈົນມີຊື່ຕິດທີມຊາດລາວ ຮຸ່ນອາຍຸ 19 ປີ ຊຸດຜ່ານເຂົ້າຮອບສຸດທ້າຍທີ່ ອຸເບກິສຖານ, ເຊິ່ງ ທຽນທັນວາ ໄດ້ເປີດໃຈວ່າ: '' ຫລັງຈາກໄດ້ຮູ່ວ່າຈະໄດ້ຍ້າຍທີມໄປຢູ່ເອສະຣາ ທີມທີ່ມີແຕ່ນັກເຕະດາວຮຸ່ງ ກໍຮູ້ສຶກຕື່ນເຕັ້ນ ແລະ ກົດດັນ ເລັກຫນ້ອຍເເຕ່ເມື່ອໄດ້ຊ້ອມກໍໄດ້ປັບໂຕ ນ້ອງກໍຮູ້ສຶກເຖິງຄວາມອົບອຸ່ນ ເເລະ ຄວາມສາມັກຄີພາຍໃນທີມ, ເຊິ່ງເປົ້າຫມາຍຂອງຕົນເອງ ແມ່ນຢາກພາ ສໂະມອສນ ເອສະຣາ ເອັຟຊີ ຄວ້າແຊ້ມ ການແຂ່ງຂັນ ເປບຊີ ລາວລີກ 1 ປະຈຳປີ 2021.
ສຳລັບ ປະຫວັດ ຂອງ ທຽນທັນວາ ແມ່ນເກີດໃນວັນທີ 01 ທັນວາ 2003 ຢູ່ທີ່ ບ້ານ ຈອມມະນີ ເມືອງໄຊເສດຖາ ນະຄອນຫລວງວຽງຈັນ, ປັດຈຸບັນ ຮຽນຢູ່ ມໍ7 ໂຮງຮຽນ ມັດທະຍົມສຶກສາສົມບູນ ຫງຽນຢູ, ຈຸຸດເລີ້ມຕົ້ນການເປັນນັກກິລາ ປີ 2012 ແມ່ນຊ້ອມຢູ່ academy ຊ້າງນ້ອຍ, ຫລັງຈາກນັ້ນໃນປີ 2018 ຫລິ້ນໃຫ້ກັບ ສະໂມສອນ ລ໋ອບສະເຕດ໋ຽມ ອະຄາເດມີ ຢູ15 ພາທີມໄດ້ອັນດັບ 4 ແລະ ໃນປີດຽວກັນຫລິ້ນໃຫັກັບ ສະໂມສອນ ຊ້າງນ້ອຍ ຢູ18 ພາທີມຄວ້າອັນດັບ 2, ປີ 2020 ຫລິ້ນໃຫ້ກັບ ສະໂມສອນ ເຄພີເອັສ ເອັຟຊີ ພາທີມຜ່ານເຂົ້າສູ່ຮອບຮອງຊະນະເລີດ ພາທີມໄດ້ອັນດັບ 4.
ສະໂມສອນ ເອສະຣາ ເອັຟຊີ ຈະໃຊ້ນັກກິລາ ທັງຫມົດ 19 ຄົນ ເຂົ້າຮ່ວມ ການແຂ່ງຂັນ ເປບຊີ ລາວລີກ 1 2021 ມີລາຍຊື່ດັ່ງລຸ່ມນີ໊:
- ຜູ້ຮັກສາປະຕູ: ຈັນທະວິໄຊ ທຽບອານົງ, ຊະນະໄຊ ສອນທະວົງ
- ກອງຫລັງ: ອານັນຕະຊາ ສີພົງພັນ, ພຸດທະວົງ ສັງວິໄລ, ທິນນະກອນ ກ້ອງຕະການ, ວັນນະເດດ ນວນມະນີອົບ, ອຸ່ນ ເພັດວົງສາ, ອານຸພາບ ໄຊນະລໍ່, ທະນາກອນ ມະໄລທອງ
- ກອງກາງ: ພັດທະນາ ພົມມະເທບ, ເລັກໂຕ ຫລວງອາໄພ, ສຸນິກອນ ສຸພູສິດ, ພຸດທະລັກ ທອງຊະນິດ, ສິງທອງ ສິຍະວົງ, ພອນປະເສີດ ມີຈະເລີນ
- ກອງຫນ້າ: ສະເຫລີມໄຊ ພົມມະວົງ, ໂຈນີ ແຫວນປະເສີດ, ອານຸສອນ ໄຊປັນຍາ, ທຽນທັນວາ ສີຈຳປາ
ການແຂ່ງຂັນບານເຕະ ເປບຊີ ລາວລີກ 1 2021 ມີ ທັງຫມົດ 6 ສະໂມສອນ ເຂົ້າຮ່ວມປະກອບມີ : ສະໂມສອນ ເອັຟຊີ ຈັນທະບູລີ, ສະໂມສອນ ປກສ ເອັຟຊີ,ສະໂມສອນ ຊ້າງນ້ອຍ ເອັຟຊີ,ສະໂມສອນ ເອສະຣາ ເອັຟຊີ,ສະໂມສອນ ວຽງຈັນ ເອັຟຊີ ຈາກແຂວງວຽງຈັນ ແລະ ສະໂມສອນ ກອງທັບ ເອັຟຊີ (ເລຶ່ອນຂຶ້ນມາຈາກ ແຊ້ມ ລິກ 2 , 2020). ການແຂ່ງຂັນແມ່ນຈະເປີດສາກໃນວັນທີ 27 ມີນາ 2021 ຮູບແບບການແຂ່ງຂັນ ແມ່ນຈະແຂ່ງແບບ 3 ຮອບຄື: ຮອບຂາໄປ, ຮອບຂາກັບ ແລະ ຮອບ 3.
ຕາຕະລາງ ການແຂ່ງຂັນແມ່ນຈະເລີ້ມແຂ່ງຂັນ ວັນທີ 27-28 ມີນາ 2021 ເຊິ່ງເປັນອາທິດທຳອິດຂອງການແຂ່ງຂັນ ມີດັ່ງນີ້:
+ ວັນເສົາ 27 ມີນາ 2021
- ເວລາ 15:00 ສະໂມສອນ ເອັຟຊີ ຈັນທະບູລີ ພົບ ສະໂມສອນ ວຽງຈັນ ເອັຟຊີ ແຂ່ງຂັນຢູ່ທີ່ສະຫນາມກິລາແຫ່ງຊາດຫລັກ 16
- ເວລາ 15:00 ສະໂມສອນ ເອສະຣາ ເອັຟຊີ ພົບ ສະໂມອສນ ກອງທັບ ເອັຟຊີ ແຂ່ງຂັນຢູ່ທີ່ສະຫນາມກິລາມະຫາວິທະຍາໄລແຫ່ງຊາດລາວ
+ ວັນອາທິດ 28 ມີນາ 2021
- ເວລາ 15:00 ສະໂມສອນ ຊ້າງນ້ອຍ ເອັຟຊີ ພົບ ສະໂມສອນ ປກສ ເອັຟຊີ ແຂ່ງຂັນຢູ່ທີ່ສະຫນາມກິລາແຫ່ງຊາດຫລັກ 16
ທຸກໆນັດແມ່ນຖ່າຍທອດສົດ ຜ່ານ Application Mycujoo
0 ຄຳ ເຫັນ
ທ່ານຕ້ອງເຂົ້າສູ່ລະບົບເພື່ອໃຫ້ ຄຳ ເຫັນ.