ຊ້າງນ້ອຍ ປະເດີມສະໜາມ ຊະນະ ເອສຣາ 3-1 ເປັນທີມນຳຕາຕະລາງ ການແຂ່ງຂັນບານເຕະ ເປບຊີ ລາວລີກ 1

       

 

            

 

 

        ການແຂ່ງຂັນເຕະບານ ເປບຊີ ລາວລີກ 1 ປະຈຳປີ  2021 ນັດເປີດສະໜາມ ມີ 2 ຄູ່ ສຳລັບຄູ່ທີ 1 ລະຫວ່າງ ສະໂມສອນ ເອສະຣາ ເປີດບ້ານສະໜາມກິລາກາງ ມະຫາວິທະຍາໄລແຫ່ງຊາດ ຫຼື ມຊ ວິທະຍາເຂດດົງໂດກ ເມືອງໄຊທານີ ນະຄອນຫຼວງວຽງຈັນ ຕ້ອນຮັບການມາຢາມຂອງ ສະໂມສອນ ຊ້າງນ້ອຍ ເອັຟຊີ ຊຶ່ງມີກອງເຊຍທີ່ເປັນນັກສຶກສາເຂົ້າຮ່ວມຊົມ ແລະ ເຊຍ 1.500 ຄົນ ສ່ວນຄູ່ທີ 2 ສະໂມສອນ ກອງທັບ ເອັຟຊີ ເປີດບ້ານສະໜາມກິລາ ກອງກິລາ ກອງທັບ (ຫຼັກ5) ເມືອງໄຊເຊດຖາ ຕ້ອນຮັບການມາຢາມ ຂອງສະໂມສອນ ວຽງຈັນ ເອັຟຊີ ທີມດັງຈາກແຂວງວຽງຈັນ ຊຶ່ງມີກອງເຊຍຂອງສອງພາກສ່ວນເຂົ້າຮ່ວມຊົມ ແລະ ເຊຍເຖິງ 700 ກວ່າຄົນ.

       ຜ່ານການແຂ່ງຂັນ ຄູ່ທີ 1 ຜົນປະກົດວ່າ: ສະໂມສອນ ຊ້າງນ້ອຍ ເອັຟຊີ ສາມາດປະເດີມສະໜາມໄດ້ຢ່າງສວຍງາມ ບຸກເອົາຊະນະ ສະໂມສອນ ເອສຣາ ເອັຟຊີ ເຖິງຖິ່ນ 3-1 ປະຕູ ຊຶ່ງທີມຢາມໄດ້ປະຕູໄປຂຶ້ນນຳເຖິງ 3 ປະຕູລວດ ຈາກການຍິງຂອງ ບຸນພະຈັນ ບຸນກອງ ໃນນາທີ 40, ນາທີ 46 ແລະ ປິດທ້າຍດ້ວຍ ການຍິງຂອງ ສຸເລມອນ ຄູລິບາລີ  (Souleymane Coulibaly) ສັນຊາດມາລີ ໃນນາທີ 71 ສ່ວນປະຕູຕີໄຂ່ແຕກຂອງ ເອສະຣາ ໄດ້ຈາກການຍິງຂອງ ອານັນຕະຊາ ສີພົງພັນ ໃນນາທີ 90+6. ຈາກໄຊຊະນະໃນເກມນີ້ ເຮັດໃຫ້ ຊ້າງນ້ອຍ ເກັບ 3 ຄະແນນສຳຄັນທຳອິດໄດ້ສຳເລັດ ຂຶ້ນເປັນທີມນຳຕາຕະລາງ ລາຍການ ບານເຕະ ເປບຊີ ລາວລີກ 1 ປະຈຳປີ 2021 ໃນປັດຈຸບັນ. ຂະນະທີ່ ອີກຄູ່ ກໍເປັນທີມນ້ອງໃໝ່ ແຊ໋ມລາຍການ ລາວລີກ 2 ປະຈຳປີ 2020 ສະໂມສອນ ກອງທັບ ເອັຟຊີ ເປີດບ້ານ ເອົາຊະນະ ສະໂມສອນ ວຽງຈັນ ເອັຟຊີ ໄປແບບຫວຸດຫວິດ 2-1 ປະຕູ ເລີ່ມເກມແຂ່ງຂັນທຳອິດ ກໍເປັນທີມຢາມ ວຽງຈັນ ເອັຟຊີ ໄດ້ປະຕູອອກນຳໄປກ່ອນ ຈາກການຍິງຂອງ ສອນໄຊ ພັນທະໄຊ  ໃນນາທີ 16 ກ່ອນເຈົ້າຖິ່ນ ກອງທັບ ຈະຍິງຄືນ ເຖິງ 2 ປະລວດ ຈາກການຍິງຂອງ ຕຽງຄຳ ບຸນຍະໄຊສີ ນາທີ 23 ແລະ ພູທອນ ອິນນະໄລ ນາທີ 27 ສົ່ງຜົນໃຫ້ ກອງທັບ ປະເດີມສະໜາມໄດ້ຢ່າງສວຍງາມ ດ້ວຍການເກັບ 3 ຄະແນນ ພ້ອມທັງເປັນອັນດັບ 2 ຂອງ ຕາຕະລາງຄະແນນ ນຳຫຼັງພຽງ ຊ້າງນ້ອຍ ເອັຟຊີ ທີ່ມີຄະແນນເທົ່າກັນ ແຕ່ປະຕູໄດ້ເສຍຂອງ ຊ້າງນ້ອຍ ດີກວ່າ.

 

 

 

 

 

 

 

 

       ສຳລັບໂປຣແກຣມການແຂ່ງຂັນນັດຕໍ່ໄປ ຈະສືບຕໍ່ກັບມາແຂ່ງຂັນໃນວັນທີ 3 ເມສາ 2021 ສະໂມສອນ ວຽງຈັນ ເອັບຊີ ພົບກັບ ແຊ໋ມເກົ່າ 5 ສະໄໝ ສະໂມສອນ ເອັຟຊີ ຈັນທະບູລີ ໃນເວລາ 15:30 ໂມງ ທີ່ສະໜາມກິລາມະຫາວິທະຍາໄລແຫ່ງຊາດລາວ, ສ່ວນສະໂມສອນ ກອງທັບ ພົບກັບ ສະໂມສອນ ເອສະຣາ ໃນເວລາ 15:30 ໂມງ ເຊັ່ນກັນ ທີ່ສະໜາມກິລາກອງທັບ (ຫຼັກ5).